ໃນອະເມຣິກາຈະມີພັກການເມືອງຫຼາຍພັກ, ປະມານ 4 ພັກ ແຕ່ສ່ວນໃຫຍ່ຈະມີແຕ່ສອງພັກໃຫຍ່ ນັ້ນກໍຄືພັກດີໂມແຄຣຕິກ ແລະ ພັກຣີພັບບລິກກັນທີ່ມີບົດບາດຫຼາຍກວ່າພັກອື່ນໆ. ສະນັ້ນເຮົາມາສຶກສາສອງພັກດັ່ງກ່າວນີ້ເບິ່ງວ່າ ຈະມີປັດຊະຍາ ແລະ ຈຸດຢືນແຕກຕ່າງກັນແນວໃດ. ສອງພັກນີ້ມີຄວາມແຕກຕ່າງ ແລະ ຄ້າຍຄືກັນຫຼາຍຢ່າງ ແຕ່ຂໍຍົກພຽງຫົວຂໍ້ສໍາຄັນທີ່ເປັນປະເດັນໂຕ້ຖຽງກັນໃນແຕ່ລະປີ.
ໝາຍເຫດ:
D = ພັກດີໂມແຄຣຕິກ Democratic Party
R = ພັກຣີພັບບຣິກກັນ Republican Party
1. ປັດຊະຍາ
D - ເສລີນິຍົມ, ອ່ຽງຊ້າຍ (ອ່ຽງຊ້າຍ ໝາຍເຖິງອ່ຽງສັງຄົມນິຍົມ).
R - ອະນຸລັກນິຍົມ, ອ່ຽງຂວາ (ອ່ຽງຂວາ ໝາຍເຖິງອ່ຽງທຶນນິຍົມ).
2. ຄວາມຄິດດ້ານເສດຖະກິດ
D - ສະໜັບສະໜູນຕະຫຼາດເສລີ. ສົ່ງເສີມການຄ້າເສລີ. ລັດກໍານົດຄ່າແຮງງານຂັ້ນຕໍ່າ.
R - ສະໜັບສະໜູນຕະຫຼາດເສລີ. ເຄີຍສົ່ງເສີມການຄ້າເສລີແຕ່ປັດຈຸບັນບໍ່ສົ່ງເສີມ. ລັດບໍ່ຄວນກໍານົດຄ່າແຮງງານຂັ້ນຕໍ່າ, ຄວນປ່ອຍໃຫ້ເປັນໄປຕາມກົນໄກຂອງຕະຫຼາດເສລີ.
3. . ຄວາມຄິດດ້ານສັງຄົມ ແລະ ມະນຸດ
D - ອີງຕາມຄວາມຮັບຜິດຊອບຂອງຊຸມຊົນ ແລະ ສັງຄົມ. ເນັ້ນຄວາມສະເໝີພາບ. ເອົາເງິນຄົນຮັ່ງມາລ້ຽງຄົນທຸກໂດຍຕັດພາສີອາກອນຄົນຮັ່ງໃນອັດຕາສູງເພື່ອນໍາເອົາເງິນ ມາອຸດໜຸນໂຄງການຊ່ວຍເຫຼືອຄົນທຸກຍາກໃນສັງຄົມ. ສະໜັບສະໜູນໂຄງການຊ່ວຍເຫຼືອຂອງລັດ. (ເປັນຄວາມເຊື່ອຂອງລັດທິສັງຄົມນິຍົມ)
R - ອີງຕາມສິດທິບຸກຄົນ ແລະ ຄວາມຍຸຕິທໍາ. ເນັ້ນສິດເສລີພາບ. ບໍ່ວ່າຮັ່ງ ຫຼື ຈົນ ກໍສຸດແລ້ວແຕ່ສິດທິຂອງບຸກຄົນ. ລັດບໍ່ຄວນບີບບັງຄັບໃຫ້ຄົນຮັ່ງເສຍພາສີອາກອນໃນອັດຕາສູງເພີືອນໍາເອົາເງິນມາລ້ຽງຄົນທຸກ ໃນສັງຄົມ. ການເຮັດແບບນັ້ນຖືວ່າບໍ່ຍຸຕິທໍາ. ບໍ່ສະໜັບສະໜູນໂຄງການຊ່ວຍເຫຼືອຂອງລັດ ເປັນຕົ້ນສະຫວັດດີການສັງຄົມ ເຊັ່ນ welfare programs. (ເປັນຄວາມເຊື່ອລັດທິທືນນິຍົມ)
4. ຈຸດຢືນທາງດ້ານທະຫານ
D - ລົດລາຍຈ່າຍທາງດ້ານທະຫານ. ສ້າງກອງທັບນ້ອຍ ແຕ່ໃຫ້ທັນສະໄໝ.
R - ເພີ່ມລາຍຈ່າຍທາງດ້ານທະຫານ. ສ້າງກອງທັບໃຫ້ຍິ່ງໃຫຍ່ ແລະ ທັນສະໄໝ.
5. ຈຸດຢືນຕໍ່ການແຕ່ງດອງລະຫວ່າງເພດດຽວກັນ.
D - ສະໜັບສະໜູນ.
R - ສະໜັບສະໜູນ.
6. ຈຸດຢືນຕໍ່ການເອົາລູກອອກ (abortion)
D - ສະໜັບສະໜູນ. ຂຶ້ນຢູ່ກັບສິດທິບຸກຄົນ. ຄວນມີກົດໝາຍຮັບຮອງ.
R - ບໍ່ສະໜັບສະໜູນ. ຄວນມີກົດໝາຍຫ້າມ.
7. ຈຸດຢືນຕໍ່ໂທດປະຫານຊີວິດ
D - ສ່ວນໃຫຍ່ສະໜັບສະໜູນ
R - ສ່ວນໃຫຍ່ສະໜັບສະໜູນ
8. ຈຸດຢືນຕໍ່ພາສີອາກອນ
D - ຄວນມີສອງລະບົບ, ຄົນຮັ່ງຄວນເສຍໃນອັດຕາສູງກວ່າຄົນທົ່ວໄປ), ຄົນທຸກເສຍໃນອັດຕາຕໍ່າ. ໂດຍທົ່ວໄປສະໜັບສະໜູນການເສຍພາສີເພີ່ມສໍາລັບກຸ່ມຄົນຮັ່ງມີເພື່ອສົ່ງເສີມໂຄງການຊ່ວຍເຫຼືອ ຂອງລັດ.
R - ຄວນມີລະບົບດຽວ, ທຸກຄົນບໍ່ວ່າຮັ່ງ ຫຼື ທຸກຄວນເສຍພາສີໃນອັດຕາສໍ່າກັນ. ເອີ່ນວ່າ flat tax or same tax rate. ໂດຍທົ່ວໄປ ບໍ່ສະໜັບສະໜູນໃນການຂຶ້ນພາສີອາກອນ.
9. ຈຸດຢືນຕໍ່ກົດລະບຽບຂອງລັດຖະບານ
D - ຈໍາເປັນຕ້ອງມີກົດລະບຽບເພື່ອປົກປ້ອງຜູ້ບໍລິໂພກ
R- ລັດບໍ່ຄວນສ້າງກົດລະບຽບຕ່າງໆນາໆເພາະມັນເປັນການທວງດືງການຕະຫຼາດເສລີ ແລະ ຄວາມເຕີບໂຕຂອງເສດຖະກິດ ຫຼື ວຽກງານ.
10 ນະໂຍບາຍທາງດ້ານສຸຂະພາບ
D - ສະໜັບສະໜູນປະກັນສັງຄົມ, ສົ່ງເສີມປະກັນສຸຂະພາບຂອງລັດ. ເຫັນດີໃຫ້ລັດມີສ່ວນຮ່ວມໃນການຈັດການສຸຂະພາບຂອງປະຊາຊົນ. ບັງຄັບທຸກຄົນໃຫ້ຊື້ປະກັນສຸຂະພາບ. ຖ້າໃຜບໍ່ຊື້ແມ່ນຖືກປັບໃໝ.
R - ບໍ່ສະໜັບສະໜູນປະກັນສັງຄົມ, ບໍ່ເຫັນດີກັບໂຄງການປະກັນສຸຂະພາບຂອງລັດ. ຄວນມອບໃຫ້ເອກະຊົນເປັນຜູ້ບໍລິຫານເພື່ອສ້າງການແຂ່ງຂັນ. ລັດບໍ່ຄວນບັງຄັບໃຫ້ປະຊາຊົນຊື້ປະກັນສຸຂະພາບ. ຄວນເປັນສິດທິຂອງບຸກຄົນ.
11 ຈຸດຢືນຕໍ່ຄົນເຂົ້າເມືອງຜິດກົດໝາຍ ແລະ ຊາວອົບພະຍົບ
D - ສະໜັບສະໜູນການເນລະເທດສະເພາະຊາວຕ່າງຊາດທີ່ເຮັດຜິດກົດໝາຍ. ສ້າງເງື່ອນໄຂໃຫ້ຜູ້ເຂົ້າເມືອງທີ່ຜິດກົດໝາຍ ແຕ່ບໍ່ເຄີຍເຮັດຜິດກົດໝາຍສາມາດໄດ້ຮັບບັດຂຽວ ແລະ ສະໝັກເປັນສັນຊາດອະເມຣິກາໄດ້. ມີນະໂຍບາຍຮັບເອົາຄົນອົບພະຍົບຫຼາຍແສນຄົນຕໍ່ປີ. ບໍ່ເຫັນດີກັບການສ້າງກໍາແພງກີດກັ້ນຊາຍແດນ.
R - ສະໜັບສະໜູນການເນລະເທດຊາວຕ່າງຊາດທຸກຄົນທີ່ເຂົ້າເມືອງຜິດກົດໝາຍ. ບໍ່ວ່າຈະຢູ່ອະເມຣິກາດົນ ຫຼື ບໍ່ດົນ ຫຼື ບໍ່ວ່າຈະເຄີຍເຮັດຜິດກົດໝາຍ ຫຼື ບໍ່, ຖ້າຢູ່ແບບບໍ່ມີເອກະສານ ຫຼື ຢູ່ແບບເຖື່ອນແມ່ນຄວນຖືກເນລະເທດກັບປະເທດເດີມຂອງຕົນ. ສະໜັບສະໜູນການສ້າງກໍາແພງກີດກັ້ນຊາຍແດນ. ມີນະໂຍບາຍຮັບເອົາຄົນອົບພະຍົບຕໍ່າກວ່າສິບພັນຄົນຕໍ່ປີ ແລະ ຄັດເລືອກເອົາແຕ່ຜູ້ມີທັກສະ ຫຼື ຄວາມຮູ້.
