ເລຶ່ອງສັ້ນ: ຄວາມຮັບຜິດຊອບ

ເລຶ່ອງສັ້ນໆແບບຍາວໆອ່ານແລ້ວຈົນວິນ: ຄວາມຮັບຜິດຊອບຕໍ່ໜ້າທີ່.
ເລຶ່ອງມີຢູ່ວ່າ ອາທິດຜ່ານມາຜູ້ຂ້າແລ່ນໂປແກຣມລືມປ່ຽນວັນທີ. ເປັນໂປແກຣມ ທີ່ຫົວໜ້າຂຽນ ເພື່ອເກັບກໍາຂໍ້ມູນຂອງເວລາ ເຮັດວຽກພິເສດ ແຕ່ລະອາທິດທີ່ທາງຫ້ອງການຕ້ອງຈ່າຍຄ່າ ແຮງງານພິເສດໃຫ້ພະນັກງານ. ເປັນໂປແກຣມເກົ່າລ້ານປີທີ່ໃຊ້ກັນມາ ຫຼາຍປີແລ້ວ ແຕ່ບໍ່ຄ່ອຍມີ ບັນຫາຫຍັງ. ບັງເອີນ ອາທິດແລ້ວນີ້ ເກີດບັນຫາ, ຜູ້ແລ່ນໂປແກຣມລືມ ປ່ຽນວັນທີໃໝ່. ເວລາແລ່ນ ໂປແກຣມມັນກໍເລີຍເກັບເອົາຂໍ້ມູນຈາກວັນທີ ເກົ່ານັ້ນກໍ ຄືເອົາຂໍ້ມູນອາທິດເກົ່າມາເປັນອາທິດໃໝ່. ຜົນເສຍຫາຍຄື: ຜູ້ທີ່ຖືກຈ່າຍຄ່າແຮງງານຜິເສດໄປແລ້ວອາທິດກ່ອນໆ, ທິດຕໍ່ມາບໍ່ໄດ້ ເຮັດວຽກພິເສດຫຍັງ ແຕ່ພັດຖືກຈ່າຍອີກຕື່ມເທື່ອໜຶ່ງ ຍ້ອນໂປແກຣມດືງເອົາຂໍ້ມູນເກົ່າ.

ຜູ້ທີ່ຖືກຈ່າຍກໍພາກັນດີໃຈເຕັ່ນດ໋ອງໆປານຖືກຫວຍລວຍເບີ. ພາກັນລ້ຽງ ໝູ່ອຶກກະທຶກນຶກນອງ. ສ່ວນຜູ້ແລ່ນໂປແກຣມກໍເຮັດເປັນ ໜ້າເສົ້າຢ້ານ ຖືກໄລ່ອອກການ.
ສາເຫດຜິດພາດຄື:
ຜູ້ຂ້າໃຊ້ໃຫ້ລູກນ້ອງອີກຄົນເປັນຄົນແລ່ນ. ເພາະບັງເອີນມື້ນັ້ນຄາເຮັດ ວຽກນໍາເຝກສບຸກ. ແບບວ່າຄົ້ນຄວ້າຊອກຫາຂໍ້ມູນຂ່າວສານຕ່າງໆຫັ້ນນາ. ບໍ່ໄດ້ຄົ້ນຄວ້າຊອກເບິ່ງຮູບສາວນ້ອຍງາມໆດັ່ງທີ່ຄິດເດີ. ສາບານໄດ້, ບໍ່ເປັນຄົນແນວນັ້ນ, ຖ້າເປັນ ຂໍ້ໃຫ້ຟ້າຜ່າຕົ້ນໄມ້...ເອົ້າ! :-D
ເລື່ອງມີຢູ່ວ່າ, ລູກນ້ອງມັນລືມປ່ຽນວັນທີ, ໂຕເອງກໍລືມກວດກາຄືນ ເພາະຄາວຽກຢູ່ເຝກສບຸກ. ອັນຜູ້ໄດ້ເງິນພິເສດໄປສອງເທື່ອ ໄດ້ໄປແລ້ວມັນຊິມິດກະບໍ່ມິດ ພາກັນ ໂອ້ອວດ ຮ້ອງໂຮ່ດີໃຈ. ຫົວໜ້າຮູ້ຂ່າວ ກໍເລີຍສືບສວນຊອກຫາສາເຫດ. ເອີ້ນຜູ້ຂ້າ ໄປສອບຖາມ. ຜູ້ຂ້າກໍບອກໄປຕາມຄວາມຈິງ, ວ່າໃຊ້ລູກນ້ອງອີກຄົນແລ່ນແທນ, ລູກນ້ອງລືມປ່ຽນວັນທີ, ສ່ວນໂຕເອງກໍຜິດຕໍ່ໜ້າທີ່ ບໍ່ກວດກາຄືນ. ສຸດທ້າຍກໍກ່າວຂໍໂທດຫົວໜ້າ, ຂໍຍອມຮັບຜິດທຸກຢ່າງ.
ສ່ວນທາງຫົວໜ້າກໍກ່າວອົບຮົມຕັກເຕືອນຜູ້ຂ້າແລ້ວກໍພະຍາຍາມໃຫ້ກໍາ ລັງໃຈ. "ຄົນເຮົາມັນຕ້ອງມີການຜິດພາດຈຶ່ງຈະຮູ້ປັບປຸງແກ້ໄຂ. ຄວາມຈິງແລ້ວມັນຫາກແມ່ນຄວາມຜິດຂອງເຮົາເອງ." ພໍຫົວໜ້າເວົ້າວ່າ ເປັນ ຄວາມຜິດຂອງຜູ້ກ່ຽວເອງ. ທາງນີ້ກໍເງີຍໜ້າເບິ່ງໜ້າຫົວໜ້າ ແບບຕົກຕະລືງ. ແຕ່ບໍ່ກ້າຖາມສາເຫດ. ຫົວໜ້າເລີຍກ່າວຕໍ່ໄປວ່າ: "ມັນເປັນຄວາມຜິດຂອງເຮົາເອງທີ່ຂຽນໂປແກຣມໄວ້ດົນແລ້ວ ແຕ່ລືມຄິດວ່າປັດຈຸບັນເຮົາສາມາດ ເຮັດໃຫ້ໂປແກຣມ ດືງເອົາວັນທີ ມື້ແລ່ນ ຫລືດືງເອົາວັນທີແຕ່ລະອາທິດໂດຍອັດຕະໂນມັດໄດ້ແລ້ວ, ແຕ່ເຮົາລືມຂຽນ code ແບບນັ້ນ. ເຮົາຍັງອາໄສໃຫ້ຜູ້ແລ່ນ ປ່ຽນວັນທີເອງຢູ່. ຄົນເຮົາມັນກໍມີຫລົງມີລືມ, ມີຜິດພາດ ສະນັ້ນເພື່ອແກ້ໄຂບັນຫານີ້, ເຮົາຈະຂຽນໃໝ່ໃຫ້ມັນດືງເອົາວັນທີ ໂດຍອັດຕະໂນມັດ ເພື່ອຫລີກລ້ຽງຄວາມຜິດພາດຂອງຄົນ ຫລື eliminate human errors." ຫົວໜ້າກ່າວມາແບບນັ້ນ ຜູ້ຂ້າປາກບໍ່ອອກເລີຍ ໄດ້ແຕ່ເຮັດເປັນອ້າປາກຈ່ອງປ່ອງ.


ເລຶ່ອງສັ້ນຊີວິດຈິງຂ້າງເທິງ ສອນໃຫ້ເຮົາຮູ້ວ່າ ຄວາມຜິດພາດຄືການພັດທະນາແກ້ໄຂ. ເປັນຄະຕິເຕືອນໃຈໃຫ້ແກ່ ຜູ້ບໍລິຫານ, ຫົວໜ້າເປັນຜູ້ຄຸມງານ, ເປັນຜູ້ ບໍລິຫານວຽກງານ ແລະ ລູກນ້ອງ. ເມື່ອມີການຜິດພາດ ເກີດຂຶ້ນບໍ່ວ່າກໍລະນີໃດໆ ສາເຫດ ສ່ວນໃຫຍ່ກໍມາຈາກຄວາມຂາດຕົກບົກຜ່ອງຂອງລະບົບບໍລິຫານ. ດັ່ງນັ້ນ ຫົວໜ້າຕ້ອງມີສ່ວນຮັບຜິດຊອບ, ຕ້ອງຍອມຮັບຜິດແທນລູກນ້ອງ, ແລະຫາວິທີແກ້ໄຂບັນຫາເພື່ອບໍ້ໃຫ້ເກີດຂຶ້ນອີກ. ເຂົາຈຶ່ງເອີ້ນວ່ານັກບໍລິຫານ.
ບໍ່ຄືບາງສັງຄົມ ບັນຫາເພຢູ່ຫລັງຄາ ອິພາກັນແປງແຕ່ຢູ່ພື້ນເປັນລຶ? :-D ;)