ໂຄງການ ມະນຸດຈະໄປຕັ້ງທິ່ນຖານ ທີ່ດາວອັງຄານ

ເລົ່າສູ່ກັນອ່ານ:
ຫລາຍທ່ານອາດເຄີຍໄດ້ຕິດຕາມຂ່າວກ່ຽວກັບຍານອະວະກາດທີ່ມີຊື່ວ່າ Mars Science Laboratory (MSL) ທີ່ທາງທີມງານ NASA ຂອງສະຫະລັດອະເມຣິກາໄດ້ສົ່ງອອກຈາກໂລກໄປດາວອັງຄານເມື່ອວັນທີ 26 ເດືອນ 11 ປີ 2011 ເຊິ່ງໃຊ້ເວລາບິນໄປດາວອັງຄານປະມານ 9 ເດືອນ ແລະ ເມື່ອບໍ່ດົນມານີ້ກໍ່ ໄດ້ລົງຈອດຢູ່ເທິງດາວ ອັງຄານ ຢ່າງປະສົບຜົນສໍາເລັດໂດຍນໍາໃຊ້ຍານບັນຈຸ ຫຸ່ນຍົນທີ່ມີລໍ້ເລື່ອນ ຮຽກວ່າ Mars Curiosity Rover. ຈຸດປະສົງຂອງການສົ່ງຍານອະວະກາດລົງສໍາຫລວດກໍ່ເພື່ອ ສຶກສາຄົ້ນຄວ້າຊອກຫາສິ່ງ ທີ່ມີຊີວິດເທິງດາວອັງຄານ ຮວມທັງຂໍ້ມູນກ່ຽວຂ້ອງກັບບົດບາດຂອງນໍ້າ, ສຶກສາ ເບິ່ງລັກສະນະພູມອາກາດ, ລັກສະນະທາງທໍລະນີສາດ ແລະເພື່ອຮວບຮວມຂໍ້ມູນທັງໝົດໃຫ້ແກ່ ຍານອະວະກາດທີ່ຈະສົ່ງໄປອີກໃນອະນາຄົດເຊິ່ງອາດມີມະມຸດຕິດຕາມໄປດ້ວຍ. ເວົ້າເລຶ່ອງມະນຸດໄປຢູ່ດາວອັງຄານ, ມື້ນີ້ຂໍສະເຫນີບົດຄວາມກ່ຽວກັບໂຄງ ການຈະສົ່ງມະນຸດໄປຕັ້ງຖິ່ນຖານຢູ່ ດາວອັງຄານສູ່ເພື່ອນຫນອນໄດ້ອ່ານເລັກນ້ອຍເນາະ. ເມື່ອສິບປີກ່ອນຖ້າມີຄົນຖາມວ່າ “ໄປຢູ່ດາວອັງຄານນໍາຂ້ອຍບໍ່?” ຫລາຍຄົນກໍ່ອາດຈະຫົວຂ້ວນ ເພາະເຫັນວ່າມັນເປັນເລຶ່ອງຕະຫລົກ, ເປັນຄວາມຝັນລົມໆແລ້ງໆ. ແຕ່ປັດຈຸບັນນີ້ ເລຶ່ອງນີ້ແມ່ນເລິ່ມຈະເປັນ ຄວາມຈິງຂຶ້ນທຸກວັນ. ເຊັ່ນໂຄງການ ດາວອັງຄານ I (Mars One project) ນໍາພາໂດຍນັກທຸລະກິດ Bas Lansdorp ຈາກໂຮແລ່ນ Holland. ໂຄງການດັ່ງກ່າວໄດ້ເລີ່ມດໍາເນິນມາໄດ້ສອງປີປາຍ ແລະປັດຈະບັນກໍ່ເລິ່ມມີນັກວິຊາການ ນັກວິທະຍາສາດແລະ ດາຣາສາດ ຟີສິກສ ຫລາຍທ່ານເຂົ້າຮ່ວມເສີມສ້າງໂຄງການ ນີ້ໃຫ້ເປັນຈິງ, ຄາດຫມາຍວ່າບໍ່ເກີນສາມສິບປີ. ແຕ່ກ່ອນຈະກ່າວເຖິງໂຄງການ Mars One, ເຮົາມາສຶກສາລາຍລະອຽດກ່ຽວກັບດາວອັງຄານກັນກ່ອນເນາະ, ພໍເບົາສະຫມອງ. ດາວອັງຄານ ຫລື Mars ແມ່ນເປັນດາວທີ່ສາມາດເອີ້ນ ໄດ້ວ່າເປັນຫນ່ວຍໂລກອີກໂລກຫນຶ່ງ ເພາະດາວດັ່ງກ່າວມີລັກສະນະຄ້າຍ ຄືກັບຫນ່ວຍໂລກມະນຸດ (earth) ທີ່ຄົງຈອນ (ວົງຈອນ) ຢູ່ພາຍໃນ galaxy ອັນດຽວກັນເອີ້ນວ່າ Milky Way galaxy. ລັກສະນະດ້ານພູມມີສາດ ແລະທໍລະນີສາດ ກໍ່ມີຫລາຍສິ່ງຄ້າຍຄືກັນກັບໂລກມະນຸດເຊັ່ນ: ດິນ, ຫີນ, ຊາຍ, ພູ, ພູເຂົາໄຟ, ທົ່ງພຽງ, ຮ່ອງຫ້ວຍ (ປັດຈຸບັນບໍ່ມີນໍ້າ, ແຕ່ຕາມຫລັກຖານແລະຂໍ້ມູນທີ່ໄດ້ຮັບ ຈາກຍານອາວະກາດຕ່າງໆ ທີ່ສົ່ງໄປເກັບກໍາຂໍ້ມູນສາມາດສະຫລຸບ ໄດ້ວ່າຫລາຍລ້ານປີຜ່ານມາ ດາວອັງຄານແມ່ນມີນໍ້າ, ມີທະເລ ແລະຫວຍນໍ້າລໍາທານຄ້າຍຄືກັນກັບໂລກມະນຸດ), ຂໍ້ສໍາຫລວດທີ່ສໍາຄັນກໍ່ຄື ປັດຈຸບັນຢູ່ດາວອັງຄານຈະ ມີ ice cap ຕິດທາງພາກເຫນືອແລະໃຕ້ທີ່ມີ ລັກສະນະຄ້າຍຄືກັບ North Pole ແລະ South Pole. ສ່ວນດ້ານພູມອາກາດນັ້ນປະກອບມີ: Carbon Dioxide 95.3% ທຽບໃສ່ໂລກເຮົາ 0.038% Nitrogen 2.7% ທຽບໃສ່ໂລກເຮົາ 78% Oxygen 0.13% ທຽບໃສ່ໂລກເຮົາ 21% Oxygen (Argon) 1.6% ທຽບໃສ່ໂລກເຮົາ 0.93% Water Vapour 0.25% ທຽບໃສ່ໂລກເຮົາ 1.0% ອຸນຫະພູມ ຫນ້າພື້ນ (surface temperature) ເຢັນຮ້ອນປະມານ −55 °C (−67 °F) ແລະ 27 °C (81 °F). ອີງຕາມຂໍ້ມູນຂ້າງເທິງສະຫລຸບໄດ້ວ່າບໍ່ມີອາກາດພຽງພໍທີ່ຈະໃຫ້ເກີດ ມີສິ່ງຊີວິດລະບົບຊີວະຄ້າຍຄືມະນຸດ (ລະບົບຫັ້ນໃຈທາງອາກາດ) ແຕ່ນັ້ນກໍ່ບໍ່ໄດ້ຫມາຍຄວາມວ່າຈະບໍ່ມີສິ່ງຊີວະແປກໆສິ່ງອື່ນສາມາດ ນໍາໃຊ້ຊີວິດຢູ່ເທິງດາວອັງຄານໂດຍຕາມທໍາມະຊາດພາກພື້ນໄດ້. ໄລຍະທາງ ຈາກໂລກມະນຸດໄປຫາ ດາວອັງຄານບໍ່ເປັນປົກກະຕິເພາະການວົງຈອນຂອງໂລກມະນຸດ ກັບດາວອັງຄານຈະຫມູນອ້ອມຕະເວັນໄລ່ເລ່ຍກັນໄປຕາມສາຍວົງຈອນໃຜມັນ ໃກ້ໄກ ຂຶ້ນຢູ່ຈຸດຫມູນວຽນ. ໄກສຸດ (ຫມານເຖິງແທກຈາກຈຸດລະວ່າງໂລກກັບດາວ ອັງຄານຢູ່ຄົນລະຝາກຫນ່ວຍຕະເວັນ) ປະມານ 100.7 million km (62.6 million miles) ໃກ້ສຸດ 88.2 million km (54.8 million miles) ສັນນິຖານວ່າ ໃນປີ 2018 ການຫມູນວຽນຂອງໂລກກັບດາວອັງຄານຈະ ຫມູນໃກ້ເຂົ້າກັນອີກເຊິ່ງໄລຍະທາງປະມານ 57.6 million km ເອົາສໍ່ານີ້ກ່ອນເນາະ. ຖ້າຈະໃຫ້ອະທິບາຍແມ່ນສິບຫນ້າເຈັ້ຍກໍ່ຍັງບໍ່ພໍ. ເອົາເປັນວ່າມາກ່າວເຖິງເລຶ່ອງໂຄງການຈະສົ່ງມະນຸດຂຶ້ນໄປສຶກສາແລະຕັ້ງຖິ່ນຖານຢູ່ດາວອັງຄານກັນຕໍ່. ໂຄງການດັ່ງກ່າວແມ່ນສະເຫນີດໍາເນີນການຕາມເປົ້າຫມາຍດັ່ງນີ້:
ປີ 2016 ຈະສົ່ງດາວທຽມສື່ສານ, ອຸປະກອນຄົ້ນຄວ້າ ແລະວັດທຸອື່ນໆສໍາຄັນໄປຕິດຕັ້ງຢູ່ດາວອັງຄານ.
ປີ 2018 ຈະສົ່ງດາວເຄາະ ລັກສະນະ ຍານອະວະກາດໃຫຍ່ large planetary rover ເພື່ອ ສໍາຫລວດຈຸດຕິດຕັ້ງສະຖານທີ່ເພື່ອຮັບຮອງມະນຸດ. ແລະຈຸດເພື່ອຈະນໍາເອົາອຸປະກອນອື່ນໆລົງ.
ປີ 2020 ຈະສົ່ງອຸປະກອນຊູສີວິດ (ເຕັ້ນ, ເຄື່ອງນອນ, ເຄື່ອງໃຊ້ເຄື່ອງກິນ ແລະອື່ນໆ ທີ່ສໍາຄັນ) ລະບົບບ່ອນພັກຢູ່ອາໄສແບບຄ້າຍຄືເຕັ້ນເຊິ່ງຈະຕິດຕັ້ງໂດຍໂອໂຕມັດ ເພື່ອຕຽມຕ້ອນຮັບມະມຸດ.
ປີ 2022 ຖ້າທຸກສິ່ງຕຽມພ້ອມ ຄະບວນມະນຸດກໍ່ຈະເລິ່ມອອກເດີນທາງ ໃນເດືອນ 9 ແລະ ຖ້ານໍ້າມັນບໍ່ຫມົດກ່ອນ ກໍ່ແມ່ນຈະໄປເຖິງ ດາວອັງຄານພາຍໃນເດືອນ 4 ປີ 2023. ຮ້ວຍ…ເວົ້າໄດ້ບໍ້ບາງນໍ້າມັນຫມົດກະມີໄດ໋ເນາະ… ການເດີນທາງແມ່ນໄປບໍ່ມີກັບ. ໄປຢູ່ດາວອັງຄານເລີຍ. ໄປຢູ່ສຶກສາຄົ້ນຄວ້າວິໄຈໄປເລື້ອຍໆເພື່ອຜົນປະໂຫຍດຂອງມະນຸດ, ແລະເພື່ອປູທາງ ສ້າງພື້ນຖານໂຄງຮ່າງໄວ້ເພື່ອການໄປຕັ້ງຖິ່ນຖານຂອງມະນຸດເຮົາ. ເປັນຫຍັງຈຶ່ງວ່າໄປບໍ່ມີກັບ? ນັ້ນກໍ່ເພາະວ່າ ປັດຈະບັນຍັງບໍ່ທັນມີເທກໂນໂລຍີ້ ທີ່ຈະນໍາເອົາມະນຸດຫລື ສິ່ງອື່ນໆທີ່ສົ່ງໄປດາວອັງຄານກັບຄືນມາໂລກມະນຸດ ໄດ້ເທື່ອ. ຍ້ອນໄລຍະທາງມັນໄກເກີນໄປ. ໂຄງການນີ້ຈະເປັນແນວໃດ ກະຕ້ອງໄດ້ເບິ່ງຕໍ່ໄປອີກເນາະ.

ປສ 2012