ແນວຄິດຫຼິ້ນໆ ຊວນຄິດ

ປ້າຍກໍ່ສ້າງເປັນພາສາຈີນໃນ ວຽງຈັນ

ແນວຄິດຫຼິ້ນໆ ຊວນຄິດ:

ນັກປະຫວັດສາດ ແລະນັກບູຮານ ຄະດີຫຼາຍທ່ານ ບໍ່ວ່າສາກົນແລະ ລາວ ໄດ້ບັນທຶກ ຂໍ້ມູນ, ຂໍ້ສັນນິຖານໄວ້ຫຼາຍ ພໍສົມຄວນກ່ຽວກັບ ຊາດລາວ, ປະຫວັດ ຄວາມເປັນມາ. ພົງສາວະດານລາວກ່າວວ່າ ຂຸນລໍ ປະຖົມກະສັດລາວ ຜູ້ໃຫ້ກໍາເນີດ ລາຊະວົງລ້ານຊ້າງ. ຍົກທັບມາແຕ່ ເມືອງແຖນ (ນານ້ອຍອ່ອຍໜູ ແຖວດຽນບຽນຟູ ປະເທດ ຫວຽດນາມປັດຈຸບັນ) ພາຍໃນປີ ຄ.ສ. 698 ເຂົາຕີເອົາເມືອງຊວາ, ພໍຍຶດເມືອງໄດ້ແລ້ວກໍເລີ່ມຂະຫຍາຍອິທິພົນໄປທົ່ວເຂດສຸວັນນະພູມ. ພາຍໃນຍຸກດຽວກັນນີ້ເອງ, ທາງນັກບູຮານຄະດີໄດ້ໃຫ້ສັນນິຖານວ່າພວກອ້າຍລາວໄດ້ ພາກັນຍົກຍ້າຍເຂົ້າມາຕັ້ງຖິ່ນຖານຕາມລຸ່ມແມ່ນໍ້າອູ, ນໍ້າຄານ, ສາລະວິນ ແລະເປັນຕົ້ນລຸ່ມແມ່ນໍ້າຂອງ ໄປເຖິງອານາເຂດຈໍາປາ...ເລິ່ມແຕ່ນັ້ນມາກໍພາກັນ ຢູ່ຜະສົມຜະສານປະປົນປົ້ນເປ້ກັນໄປທົ່ວຈົນກາຍມາເປັນ ຊາດລາວປັດຈຸບັນ. ຫຼາຍຄົນຖາມວ່າ ອະລິຍະທັມ ຂອມໄປໃສ, ສີໂຄດຕະບຸນຫາຍໄປໃສ? ອະລິຍະທັມທົ່ງໄຫຫິນໄປໃສ,  ຜູ້ສ້າງຜາສາດບູຮານວັດພູຫາຍໄປໃສ? ລາວເຮົາຄືເກັ່ງແທ້ ຂັບໄລ່ພວກນີ້ໜີໄປໝົດນໍ້.

ເຂົ້າໃຈຜິດກັນແລ້ວ. ພວກເຂົາເລົ່ານັ້ນບໍ່ໄດ້ຫາຍໄປໃສ. ແຕ່ຢູ່ໃນສາຍເລືອດເຮົານີ້ແຫຼະ, ເຂົາເຈົ້າຄືບັນພະບຸລຸດຂອງພວກເຮົາອີກສາຍໜຶ່ງ. ເພາະລາວເຮົາໄດ້ກືນກິນເອົາ ວັດທະນະທັມຂອງພວກເຂົາເຈົ້າ. ແລະການກືນກິນວັດທະນະທັມດັ່ງກ່າວແມ່ນໃຊ້ເວລາປະມານ 600-700 ປີ ເລິ່ມແຕ່ປີຂຸນລໍຍົກທັບຕີເມືອງຊວາເຖິງປີ 1354, ປີພະເຈົ້າຟ້າງຸ່ມສ້າງຕັ້ງອະນາ ຈັກລາວລ້ານຊ້າງຢ່າງເປັນທາງການ. ແນວຄິດຫລິ້ນໆຊວນຄິດກໍຄື:

ເລິ່ມແຕ່ປີ 1354 ເຖິງປັດຈຸບັນກໍປະມານ 661 ປີແລ້ວໄດ໋ເນາະ. ຄໍາຖາມກໍຄື, ໃກ້ຈະເຖິງຄາວທີ່ລາວ ເຮົາຈະຍອມຮັບເອົາຄໍາສາບຂອງ ພະຍາສີໂຄດແລ້ວບໍ? ທີ່ສາບໄວ້ວ່າຊາດລາວຈະຕ້ອງຖືກຊາດອື່ນກືນກິນຄືນເຈັດຊົ່ວໂຄດເພາະເຮົາເຄີຍກືນກິນ ຊາດຂອມມາກ່ອນ? ແລະຊາດທີ່ກໍາລັງກືນກິນລາວເຮົາຕອນນີ້ກໍຄືພາບທີ່ເຫັນນັ້ນແລ.  ໄລ່ເບິ່ງນິ້ວກ້ອຍນີ້ວນາງແລ້ວ ມັນກໍຄົບຮອບ 600-700 ປີແລ້ວໄດ໋ເນາະ. ເອົາກືນກະກືນສະ. ເປັນຈີນກະດີຄືກັນ. ຊິໄດ້ລວຍໆ ເຮັງໆ ກັນແດ່ບາດນິ... :-D

ປສ