ສິນຫ້າ ພາໃຫ້ຮັ່ງມີ

ທິດແລ້ວນີ້ ໄປຊອກຫາກິນເຂົ້າວັດ. ໄດ້ພໍ້ພຣະອາຈານທ່ານໜຶ່ງ ທີ່ເພິ່ນສອນ ສິນຫ້າ ທີ່ແຕກຕ່າງຈາກທຸກໆ ອົງທີ່ຜູ້ຂ້າເຄີຍໄດ້ຍິນຜ່ານມາ. ກໍເລີຍມາເລົ່າສູ່ກັນຟັງ. ກ່ອນອື່ນຂໍເອົາ ສິນຫ້າມາແປະໄວ້ກ່ອນເນາະ. ຫຼາຍຄົນອາດເຄີຍໄດ້ຍິນ ໄດ້ຟັງ ເວລາໄຫວ້ພຣະຮັບສິນໃນງານປະເພນີຫລືງານບຸນຕ່າງໆ ທີ່ມີພິທີກໍາທາງສາສະໜາ. ເຊິ່ງຈະເລີ່ມຕົ້ນດ້ວຍພິທີບູຊາດອກໄມ້, ຄໍາປ່າວເທວະດາ ລົງທ້າຍດ້ວຍຄໍາອາລາດທະນາສິນຫ້າ. ສິນຫ້າທີ່ຊາວພຸດທັງປວງຄວນປະຕິບັດຕາມຄື:

1. ຫ້າມຂ້າສັດຕັດຊີວິດ ຫລືຫ້າມທໍາລາຍຊີວິດ:
- ປານາຕິປາຕາ ເວຣະມະນີ ສິກຂາປະທັງ ສະມາທິຢາມິ
2. ຫ້າມລັກ, ຫ້າມເອົາສິ່ງຂອງທີ່ເຂົາບໍ່ໃຫ້:
- ອະທິນນາທານາ ເວຣະມະນີ ສິກຂາປະທັງ ສະມາທິຢາມິ
3. ຫ້າມຫລິ້ນຊູ້ສູ່ ເມຍ/ຜົວ ຄົນອື່ນ, ຫລືປະພຶດຜິດໃນກາມ:
- ກາເມສຸ ມິດສາຈາຣາ ເວຣະມະນີ ສິກຂາປະທັງ ສະມາທິຢາມິ
4. ຫ້າມຕົວະ:
- ມຸສາວາທາ ເວຣະມະນີ ສິກຂາປະທັງ ສະມາທິຢາມິ
5. ຫ້າມດື່ມຫລືເສບສິ່ງມືນເມົາ:
- ສຸຣາເມຣະຍະ ມັດຊະ ປະມາທັດຖານາ ເວຣະມະນີ ສິກຂາປະທັງ ສະມາທິຢາມິ.
ນັ້ນຄືສິນຫ້າ, ທ່ານອາຈານດັ່ງກ່າວເພິ່ນສອນວ່າ ຖ້າຊາວລາວທຸກຄົນ ປະຕິບັດໄດ້ຕາມ ສິນຫ້າທັງຫ້າຂໍ້ນີ້ ສັງຄົມລາວແມ່ນວ່າຈະເລີນກວ່າ ສັງຄົມໃດໆໃນໂລກ. ຈະເລີນໂດຍຈິດຕະ ແລະວັດຖຸ. ຜູ້ຂ້າຂ້ອງໃຈກັບຄໍາວ່າ ວັດຖຸ ເລີຍຖາມອາຈານໄປວ່າ: ອາຈານ, ຂ້ານ້ອຍເຂົ້າໃຈ ກັບຄໍາວ່າ ຈະເລີນດ້ານຈິດຕະ ແຕ່ບໍ່ເຂົ້າໃຈກັບຄໍາວ່າ ຈະເລີນທາງດ້ານວັດຖຸ, ສິນຫ້າ ສາມາດເຮັດໃຫ້ເຮົາຈະເລີນທາງ ດ້ານວັດຖູໄດ້ແທ້ບໍອາຈານ? ອາຈານທ່ານເລີຍຕອບວ່າ, ຈະເລີນແທ້ ຖ້າປະຕິບັດໄດ້ທຸກຂໍ້. ເພາະແຕ່ລະຂໍ້ ທີ່ບັນລຸໄວ້ແມ່ນແນໃສ່ຄວາມຜາສຸກ ຄວາມອຸດົມສົມບຸນ, ຄວາມຈະເລີນຂອງຄົນ. ເປັນຕົ້ນຂໍ້ທີ່ຫ້າ, ຫຼາຍຄົນອາດເຂົ້າໃຈພຽງແຕ່ ສຸຣາ ຫລືການມືນເມົາ. ແຕ່ຄວາມເປັນຈິງແລ້ວ ຂໍ້ນີ້ສອນໃຫ້ຄົນສ້າງສະຕິປັນຍາ. ສະແຫວງຫາຄວາມຮູ້ ຄວາມເລິກເຊິ່ງຂອງປັດຊະຍາ ແລະຄວາມທ່ຽງແທ້. ສອນໃຫ້ຄົນບໍ່ປະມາດ, ໃຫ້ມີສະຕິ. ສ່ວນຄໍາວ່າ ສຸຣາ ຫລືສິ່ງມືນເມົາທີ່ຫ້າມນັ້ນ ເປັນພຽງຄໍາປຽບທຽບ ເພາະສິ່ງເຫຼົ່ານີ້ ເຮັດໃຫ້ຄົນຂາດສະຕິ. ຖ້າເຮົາເສບຕິດກັບສິ່ງຂອງມືນເມົາ, ມືນເມົານີ້ ບໍ່ແມ່ນພຽງແຕ່ເປັນການເມົາເຫຼົ້າເມົາຢາ ແຕ່ກວມທັງເມົາທຸກຢ່າງ ເມົາຄວາມງາມ, ເມົາສິ່ງຂອງແພງໆ ເມົາກະເປົາລຸ້ຍ ເຊີແນວ, ເພີ້ເຈີ້ເພີ້ຝັນຫລົງໄຫລ, ງົມງວາຍ ນັ້ນຄືຄວາມໝາຍມືນເມົາ, ຖ້າເຮົາເສບຕິດສິ່ງເຫຼົ່ານີ້້ເຮົາກໍຈະຂາດສະຕິປັນຍາ.

ທາງນີ້ຮ້ອນໃຈເລີຍຖາມ, ອ້າວວ ອາຈານ ແລ້ວ ຂໍ້ຫ້ານິ ເຮັດໃຫ້ເຮົາຮັ່ງມີດ້ານວັດທຸແນວໃດ? ອາຈານເລີຍຕອບແບບ ເປັນຄໍາຖາມໆຄືນ, ເອົ້າ...ຖ້າຄົນເຮົາມີສະຕິປັນຍາເປັນເລີດແລ້ວ, ບວກກັບ ສິນທັງ4 ຂໍ້.  ເຊັ່ນ: ຂໍ້ 1. ສອນໃຫ້ຄົນມີຄວາມເມດຕາປານີ. ຂໍ້ 2 ສອນໃຫ້ຄົນບໍ່ໃຫ້ໂລບມາກໂລພາ, ບໍ່ໂກບໂກຍ, ບໍເອົາປຽບຄົນອື່ນ. ຄໍາວ່າ ຫ້າມລັກກໍແປວ່າ ຫ້າມໂລບມາກໂລພານັ້ນເອງ.  ຂໍ້ 3. ໃຫ້ກຽດເຊິ່ງກັນແລະກັນ, ການຫລິ້ນຊູ້ຄືການບໍ່ໃຫ້ກຽດກັນ. ຂໍ້ 4. ສອນໃຫ້ມີສັດຈະວາຈາ, ສັດຊື່ສຸດຈະລິດ.   ມະນຸດເຮົາຖ້າມີຄຸນສົມບັດຄົບທັງ 5 ສິນເຫຼົ່ານີ້ແລ້ວ ພໍ່ອອກຄິດວ່າຍັງຈະທຸກອີກຫຼຶ?
ທາງນີ້ກໍເລີຍໄດ້ແຕ່ນັ່ງຍໍມືພະນົມນົບ, ສາທຸ!