ບ້ານລ້ານຊ້າງ ແຫ່ງເມກາ

ບ້ານລ້ານຊ້າງ ເມືອງCoteau ລັດ Louisiana

ປີໃໝ່ ລາວທີ່ຜ່ານມາ ຜູ້ຂ້າໄດ້ມີ ໂອກາດພາ ຄອບຄົວໄປທ່ຽວ ຫລິ້ນປີໃໝ່ ໃນພາກກາງ ຂອງອະເມຣິກາ ໄປລັດ Texas, Tennessee, ແລະ Louisiana.  ສ່ວນໃຫຍ່ກໍຈະໄປທ່ຽວ ຊົມວັດວາອາຮາມ ທີ່ສວຍສົດ ງົດງາມຫຼາຍໆວັດ. ພີ່ນ້ອງຊາວລາວ ທີ່ຢູ່ອະເມຣິກາຖືວ່າ ຍັງຮັກສາ ວັດທະນະທໍາ,

ວັດລາວທໍາມະຣັດຕະນະຣາມທີ່ ບ້ານລ້ານຊ້າງ

ຮັກສາແລະສົ່ງ ເສີມສາສະໜາ ພຸດຢ່າງອາລັງການ.  40ປີທີ່ຄົນ ລາວໄດ້ອົບພະຍົບມາ ຢູ່ອະເມຣິກາ ສິ່ງດຽວທີ່ໂດດເດັ່ນກວ່າ ຊາວອິນໂດຈີນ ທີ່ອົບພະຍົບ ມາພ້ອມໆກັນຫລັງສົງຄາມ ເຊັ່ນ ຂະເໝນ ແລະຫວຽດນາມ, ກໍຄືການ ສ້າງວັດ.  ລາວຈະເອົາໃຈໃສ່ສ້າງ ວັດໃຫ້ເປັນ ສູນກາງຂອງສັງ ຄົມລາວຢູ່ທຸກໆລັດໃນອະເມຣິກາ. ເຊິ່ງຜູ້ຂ້າໄດ້ຂຽນໄວ້ກ່ຽວກັບ ບົດເລຶ່ອງ ອະນາຈັກລ້ານຊ້າງ ແຫ່ງອະເມກາ. ທ່ານໃດສົນໃຈກໍກັບໄປອ່ານໄດ້ເລີຍ. 

ການເດີນທາງໃນຄັ້ງນີ້ຜູ້ຂ້າໄດ້ມີໂອກາດ ໄປຢ້ຽມຢາມບ້ານລ້ານຊ້າງທີ່ຕັ້ງຢູ່ເມືອງ Coteau, ລັດ Louisiana.  ປະຫວັດຄວາມເປັນມາຂອງການ ສ້າງບ້ານດັ່ງກ່າວຕາມ ເອກະສານ ທາງການແມ່ນສ້າງຂຶ້ນພາຍໃນປີ 1980-90s

ວັດລາວທໍາມະຣັດຕະນະຣາມທີ່ ບ້ານລ້ານຊ້າງ

ໂດຍຊາວລາວ ອົບພະຍົບມາຕັ້ງ ຖິ່ນຖານຢູ່ອ້ອມ ແອ້ມເມືອງດັ່ງກ່າວ. ເມື່ອມີຊາວລາວ ຍົກຍ້າຍເຂົ້າມາ ຢູ່ອາໄສ ຫຼາຍຂຶ້ນ ກໍເລີຍພາກັນ ລົງທືນຊື້ດິນ ແລ້ວຕັ້ງເປັນບ້ານ ໂດຍສ້າງວັດ ເປັນສູນກາງ.  ສ້າງຖະໜົນຂຶ້ນ 4 ສາຍ ເອີ້ນວ່າ

ວັດລາວທໍາມະຣັດຕະນະຣາມທີ່ ບ້ານລ້ານຊ້າງ

ຖະໜົນ ຈໍາປາ ເປັນສາຍຫຼັກ ຜ່ານໜ້າວັດ ເປັນສາຍຂື່ເຮືອນແລ້ວ ມີອີກ ສາມສາຍ ຕັດໃສ່ຄ້າຍຄື ຫຼັກເສົາ ຄໍ້າຂື່ເຮືອນ ນັ້ນກໍຄືເສົາຄໍ້າວັດ ນັ້ນເອງ. ຖະໜົນສາມສາຍ ນັ້ນມືຊື່ວ່າ ສະຫວັນນະເຂດ, ວຽງຈັນ, ແລະຫຼວງພະບາງ (ໃຫ້ສັງເກດໃນ ແຜນທີ່ຂ້າງລຸ່ມສຸດ).

ນີ້ເຫັນວ່າເປັນບ້ານທໍາ ອິດທີ່ຄົນລາວ ສາມາດສ້າງຂຶ້ນ ເປັນບ້ານລາວແທ້ໆ ຢູ່ອະເມຣິກາ ໂດຍທຸກຟາກທາງພາຍ ໃນບ້ານຈະເປັນເຮືອນຂອງຄົນລາວ ທັງໝົດ. ມີນໍາກັນປະມານ ຮ້ອຍຫລັງຄາເຮືອນ.  ເປັນບ້ານທີ່ໜ້າເກັບ ມາສຶກສາກ່ຽວກັບການ ຍົກຍ້າຍຊາວລາວ ແບບບູຮານແລະສະໄໝໃໝ່. ແຕ່ບູຮານມາຊົນຊາດລາວ ໄດ້ຍົກຍ້າຍແຕກຜ່າຍ ໄປທົ່ວທຸກມຸມໂລກ, ແຕ່ສິ່ງທີ່ປິຕິຍິນດີກໍ່ຄື ບໍ່ວ່າຢູ່ໃສເມື່ອມີໂອກາດ ເປີດເຜີຍຕົວຕົນ,

ຈະຮ້ອຍປີພັນປີ ຊົນຊາດລາວກໍຈະເປີດເຜີຍ ໃຫ້ຊາວໂລກຮັບຮູ້ ວ່າຕົນເອງຄືລາວ. ດັ່ງທີ່ເຮົາເຫັນໆ ໃນປະເທດໄທຍ ຄວາມເປັນລາວ ຫາຍໄປຫຼາຍຮ້ອຍປີ ຍ້ອນການກົດຂີ່ຂົມເຫັງ ແລະຍ້ອນຖືກລ້າງສະໝອງແລະຈິດວິນຍານໃຫ້ ລືມລາວແລ້ວກາຍເປັນໄທຍ ແຕ່ສຸດທ້າຍເມື່ອ ບໍ່ດົນມານີ້ ກໍເລີ່ມມີການເປີດປະກາດຕົນເອງວ່າ ເປັນລາວເຊັ່ນມີການໂຄສະນາເລຶ່ອງ ບ້ານລາວວຽງ, ລາວຄັງ, ລາວພວນ, ລາວໂສງ ແລະລາວອື່ນໆ ຕາມພາກກາງຂອງໄທຍ ໂດຍມີວັດເປັນສູນກາງ, ແລະມີວັດທະນະທໍາ ແລະພາສາເປັນ ເອກະລັກບົ່ງບອກເຖິງຄວາມເປັນລາວຄືນໃໝ່.  ແຕ່ການຟື້ນຟູຊົນຊາດລາວໃນໄທຍ ຄືນໄດ້ນັ້ນຄວາມເປັນຈິງແລ້ວຍ້ອນ ວັດທະນະທໍາລາວກືນກິນສະຫຍາມ ບໍ່ແມ່ນສະຫຍາມກືນກິນລາວ.  ແຕ່ໃນກໍລະນີ ບ້ານລ້ານຊ້າງ ແຫ່ງເມືອງ Coteau, ລັດ Louisiana ນີ້

ຜູ້ຂ້າວາດພາບ ຮ້ອຍປີເມືອໜ້າ ແມ່ນເຫັນ ຊົນຊາດລາວ ຊາວ ອະຫົມໃນ ປະເທດອິນເດຍ. ເຊິ່ງເມື່ອກ່ອນເຂົາ ເຈົ້າກໍຕັ້ງເປັນ ບ້ານລາວ ມີວັດເປັນສູນກາງ ແລະກໍພະຍາຍາມຮັກ ສາວັດທະນະທໍາ ຕົນເອງ, ແຕ່ສຸດທ້າຍກໍຖືກ ວັດທະນະທໍາ ອິນເດຍ ກືນກິນ ເພາະກໍາລັງວັດທະນະທໍາ ອິນເດຍແຂງແຮງກວ່າ. ຊາວອະຫົມ ຈຶ່ງກາຍເປັນ ອິນເດຍທັງ ຊົນຊາດ ແລະວັດທະນະທໍາ. ເຫຼືອໄວ້ໃຫ້ເຫັນ ກໍພຽງ ສິລະປະບາງພາກສ່ວນ. ບ້ານລ້ານຊ້າງນີ້ກໍເຊັ່ນກັນ, ອີກຮ້ອຍປີເມື່ອໜ້າກໍຈະເຫລືອແຕ່ສິລະປະອາຄານວັດ, ຊື່ຖະໜົນ, ຊື່ບ້ານ ທີ່ເປັນຊື່ລາວ ແຕ່ຜູ້ຢູ່ອາໄສກໍຈະກາຍເປັນຊາວອະເມຣິກາໄປໝົດ. ແຕ່ເຖິງຢ່າງໃດກໍດີ ກ່ອນຈະໄປເຖິງຈຸດນັ້ນ, ຕອນນີ້ເຮົາມາ ພູມໃຈໃນຄວາມເປັນລາວ, ບໍ່ວ່າຢູ່ໃສກໍຍັງເປັນລາວຊາວ ລ້ານຊ້າງປາງປະຖົມແທ້ແລ. ຊາດລາວເຖິງຈະນ້ອຍແຕ່ ບໍ່ດ້ອຍວັດທະນະທໍາ...

ຂໍ້ມູນຕາມລີ້ງຂ້າງລຸ່ມ. ພ້ອມແຜນທີ່.

ແຜນທີ່ບ້ານລ້ານຊ້າງ ຈາກ Google Map

https://www.google.com/webhp?ie=utf-8&oe=utf-8#q=lanexang+village+louisiana