ຄວາມແຕກຕ່າງລະຫວ່າງ ຄົນນິໄສດີ ກັບຄົນດີ

ຄົນນິໄສດີ ກັບຄົນດີ ບໍ່ຄືກັນ. ຢາກຮູ້ຄົນນິໄສດີກັບຄົນດີແຕກຕ່າງ ກັນຢູ່ບ່ອນໃດກະລຸນາອ່ານຕໍ່:

1. ຄົນນິໄສດີຈະມັກເວົ້າຍົກຍ້ອງເຮົາເພື່ອເອົາໃຈ. ແຕ່ຄົນດີຈະເວົ້າຄວາມຈິງເຖິງແມ່ນວ່າຄວາມຈິງຈະເຮັດໃຫ້ເຮົາເສຍໃຈກໍຕາມ. ຄວາມຈິງຈະເຮັດໃຫ້ເຮົາພັດທະນາໂຕເອງດີຂຶ້ນ.
 

2. ຄົນນິໄສດີຈະເຮັດດີກັບເຮົາເພື່ອຫວັງສິ່ງຕອບແທນ.  ຄົນດີຈະເຮັດດີກັບເຮົາບໍ່ຫວັງຫຍັງຕອບແທນ. ເພາະເຂົາເຮັດດີເພື່ອເຂົາເອງ, ບໍ່ແມ່ນເພື່ອເຮົາ.

3. ຄົນນິໄສດີຢ້ານຕໍ່ການປະຕິເສດດັ່ງນັ້ນເຂົາຈຶ່ງພະຍາຍາມ ເຮັດທຸກວິທີທາງ ເພື່ອບໍ່ໃຫ້ຖືກປະຕິເສດ ບາງເທື່ອເຖິງຕ້ອງກັບໃສ່ໜ້າກາກ.  ຄົນດີບໍ່ຢ້ານຕໍ່ການປະຕິເສດເພາະເຂົາເປັນໂຕເຂົາເອງ. ເປັນເອກະລັກຂອງເຂົາເອງ. ຈະຮັບເຂົາຫຼືບໍ່ຮັບກໍສຸດແລ້ວແຕ່ໃຈ.

4. ຄົນນິໄສດີຈະເປັນຫ່ວງເລຶ່ອງກຽດແລະສັກສີ.  ຈະມັກສ້າງພາບໃຫ້ຄົນຍ້ອງຍໍວ່າໂຕເອງດີ.  ຄົນດີບໍ່ໃສ່ໃຈເລຶ່ອງກຽດແລະສັກສີ, ບໍ່ມັກສ້າງພາບ.  ເພາະຄວາມດີຢູ່ທີ່ໃຈບໍ່ແມ່ນຢູ່ທີ່ພາບ ຄືໃນລະຄອນ.

5. ຄົນນິໄສດີຈະບໍ່ມີຈຸດຢືນເປັນຂອງຕົນເອງ, ໃຜເວົ້າຫຍັງກໍຈະເຫັນດີໄປໝົດ ເພື່ອສ້າງພາບວ່າຕົນເອງດີ. ຄົນດີຈະມີຈຸດຢືນເປັນຂອງ ຕົນເອງຢ່າງຊັດເຈນ.  ມີອຸດົມການເປັນຂອງຕົນເອງ. ຈະບໍ່ປະຈົບປະແຈງ, ຕໍ່ແຫຼສະແດງຫຼາຍໜ້າເພື່ອເອົາໃຈເຮົາ.

6. ຄົນນິໄສດີຈະມັກອໍເສາະເອົາໃຈແລະ ສະແດງກິລິຍາວາຈາອ່ອນຫວານເພື່ອເອົາໃຈເຮົາ. ຄົນດີຈະບໍ່ມັກອໍເສາະ, ແຕ່ຈະສະແດງຄວາມດີດ້ວຍການກະທໍາ. 

7. ຄົນນິໄສດີຈະບໍ່ກ້າຍອມຮັບຜິດ ເພາະຢ້ານເສຍໜ້າແລະຈະມັກໂຍນຄວາມຜິດໃຫ້ຄົນອື່ນສະເໝີ. ຄົນດີຈະຍອມຮັບຜິດ ເພາະເຂົາບໍ່ຢ້ານຂາຍໜ້າ. ຄວາມດີຢູ່ທີ່ໃຈບໍ່ໄດ້ຢູ່ທີ່ໜ້າ.

8. ຄົນນິໄສດີມັກຈະໃຫ້ສັນຍາໃນສິ່ງທີ່ຕົນເອງບໍ່ສາມາດເຮັດໄດ້ຫຼືໃຫ້ໄດ້. ແຕ່ຄົນດີຈະໃຫ້ສັນຍາແຕ່ສິ່ງທີ່ຕົນໃຫ້ໄດ້ແລະເຮັດໄດ້.

9. ຄົນນິໄສດີຈະມັກສະແດງເປັນພະເອກຂີ່ມ້າຂາວມາຊ່ວຍ ຍາມເຮົາບໍ່ຕ້ອງການ ແຕ່ຈະຫາຍໜ້າໜີໃນເວລາເຮົາຕ້ອງການ. ຄົນດີພ້ອມຈະຊ່ວຍເຮົາໄດ້ທຸກເມື່ອທຸກຍາມ. ເອີ້ນເຊົ້າໄດ້ຄໍ່າ.
 

10. ຄົນນິໄສດີຈະບໍ່ໃຫ້ຄວາມສໍາຄັນກັບເຮົາເມື່ອເຫັນວ່າ ເຮົາບໍ່ມີປະໂຫຍດຫຍັງຕໍ່ເຂົາ. ຄົນດີຈະໃຫ້ຄວາມສໍາຄັນກັບເຮົາສະເໝີບໍ່ ວ່າເຮົາຈະຢູ່ໃນຖານະໃດກໍຕາມ. ເພາະກົງຈັກຂອງໂລກໝູນວຽນໄປມາ.  ການມອງຂ້າມຄົນໃນວັນນີ້ ອາດເສຍຄົນດີໃນວັນໜ້າ. ຂີ້ເຫຍື້ອຂອງຄົນໜຶ່ງຄືເພັດເມັດງາມຂອງອີກຄົນໜຶ່ງ.  ນັ້ນຄືສັດຈະທໍາອັນທ່ຽງແທ້ຂອງສັງຄົມໂລກນີ້.

11. ຄົນນິໄສດີຈະບໍ່ມີແນວຄິດເປັນຂອງຕົນເອງ ແລະຈະມັກໃຫ້ຄົນອື່ນຈູງດັງສະເໝີ. ຄົນດີຈະກໍານົດຊີວິດດ້ວຍຕົນເອງ ແລະຈະຕັດສິນໃຈດ້ວຍຕົນເອງ.

12. ຄົນນິໄສດີຈະພະຍາຍາມເຮັດທຸກສິ່ງແມ່ນແຕ່ສິ່ງທີ່ຜິດກໍຕາມເພື່ອ ຮັກສາມິດຕະພາບ. ແຕ່ຄົນດີຈະເຫັນວ່າ ບາງຄັ້ງການກະທໍາແບບນັ້ນ ເພື່ອຮັກສາມິດຕະພາບ ເປັນການທໍາລາຍ ມິດຕພາບເສຍເອງ, ສະນັ້ນເຮັດໃນສິ່ງທີ່ຖືກຕ້ອງ ເຖິງຈະເສຍມິດກໍຕາມ ແຕ່ຈະເປັນຜົນດີໃນພາຍຫຼັງ. 

13. ຄົນນິໄສດີຈະເວົ້າໃນສິ່ງທີ່ຄົນຢາກຟັງ. ແຕ່ຄົນດີຈະເວົ້າໃນສິ່ງທີ່ຄົນ (ຈໍາເປັນ) ຕ້ອງການຟັງ.
 

14. ຄົນນິໄສດີຈະບໍ່ມັກຂໍໂທດບໍ່ວ່າຜິດຫຼືຖືກເພາະຄິດວ່າ ການຂໍໂທດຈະເຮັດໃຫ້ໂຕເອງອ່ອນແອ. ຄົນດີຈະຂໍໂທດທຸກຄັ້ງບໍ່ວ່າ ຜິດຫຼືຖືກ. ເພາະການຂໍໂທດຄືການເປີດໂອກາດ ປັບຄວາມເຂົ້າໃຈແລະເພື່ອແກ້ບັນຫາ.

15. ຄົນນິໄສດີຈະຢູ່ເພື່ອຕົນເອງ. ແຕ່ຄົນດີຈະຢູ່ເພື່ອສັງຄົມ.

ສະຫຼຸບຄື ກິລິຍາຂອງ ຄົນນິໄສດີແມ່ນ ເນັ້ນເພື່ອຮັກສາໜ້າຕາ ຫຼືພາບພົດພາຍນອກ. ແຕ່ຄົນດີແມ່ນເນັ້ນການກະທໍາຕາມ ບຸກຄະລິກຂອງຕົນແລະເພື່ອ ຄຸນສົມບັດສິນທໍາ.
ຄົນນິໄສດີຈະເລືອກ ທາງອອກທີ່ງ່າຍກວ່າ, ຄົນດີຈະເລືອກທາງອອກທີ່ ຍາກແລະສັບຊ້ອນ. ຈະ ບໍ່ລົບໜີບັນຫາແຕ່ຈະປະເຊີນຕໍ່ບັນຫາ, ຕໍ່ຄວາມຈິງ. ຈະກໍານົດຊາຕາຊີວິດຂອງໂຕເອງ, ໃຊ້ສິດ ເລືອກທາງເດີນຂອງໂຕເອງແລະໃຊ້ຊີວິດຢ່າງມີເປົ້າໝາຍ.

ອ່ານມາຮອດນີ້, ທ່ານລອງສັງເກດຄົນອ້ອມຂ້າງຂອງທ່ານລອງ ເບິ່ງວ່າຢູ່ໃນລັກສະນະໃດ? ທ່ານເດ ເປັນຄົນລັກສະນະໃດ? ຄົນນິໄສດີຫຼືຄົນດີ?  ຖ້າເປັນຄົນດີ, ກໍຂໍຂອບໃຈ ເພາະໂລກນີ້ຍັງຕ້ອງການຄົນດີຢ່າງຫຼວງຫຼາຍ.

ປສ
8/31/2017