ສະຫລອງປີໃຫມ່ ຢູ່ ອະເມຣິກາ

ຂ້ອຍເປັນຄົນລາວພົ້ນທະເລນັ້ນກະຄືລາວນອກປະເທດ. ປັດຈຸບັນນີ້ ຂ້ອຍອາໃສຢູ່ ອະເມຣິກາ ຣັດ ແມສຈຸແຊດສ Massachusetts. ນີ້ແມ່ນການສະເຫລີມສະຫລອງ ບຸນປີໃຫມ່ລາວຂອງຂ້ອຍຢູ່ອະເມຣິກາ. ຣັດຫລືແຂວງຂ້ອຍຢູ່ມີຄົນລາວບໍ່ຫລາຍບໍ່ຫນ້ອຍ ພໍຮ້ອງຫາຕໍາຈອກ ເຫລົ້າກັນໄດ້ຢູ່ ແຕ່ກໍຍາກທີ່ຈະໄປມາຫາສູ່ກັນເພາະ ວ່າທຸກຄົນກໍຄາວຽກຄາງານໃຜມັນ. ເມືອງຂ້ອຍຢູ່ບໍ່ມີວັດລາວແຕ່ພາຍໃນຣັດທີ່ຂ້ອຍ ຢູ່ກໍພໍມີວັດລາວຢູ່ສອງສາມວັດທີ່ຫ່າງຈາກບ້ານຂ້ອຍໄປປະມານຫນຶ່ງຊົ່ວ ໂມງ. ຖ້າຂັບລົດຊ້າແດ່ຄືຂ້ອຍກໍຄືຊິປະມານ 2 ຊົ່ວໂມງນີ້ແລະ. ປີໃຫມ່ລາວທຸກປີເພີ່ນກໍພາກັນທໍາບຸນຕັກບາດສົງນໍ້າພຣະຢູ່ວັດຄືກັນ. ແຕ່ເລື່ອງຫົດນໍ້າກັນນັ້ນບໍ່ມີດອກ. ເພາະຣັດຂ້ອຍຢູ່ຍັງຫນາວຫລາຍ. ບາງບ່ອນກໍຍັງມີຫິມມະຕົກຢູ່. ເປັນຕົ້ນແຖວເທີງພູ. ອາກາດຫນາວປານນີ້, ລອງມາຫົດນໍ້າຂ້ອຍເບິ່ງຕີນາງໂມະນ້ອຍເອີຍ… ຄັນເຈົ້າບໍ່ຢ້ານແຂງກະດ້າງສັ່ນງັ໋ກໆເປັນໄຂ້ສາມມື້ບໍ່ຫາຍນະ.

ບາງວັດກໍ່ມີການຄັດເລືອກຫລືເພີ່ນຮຽກວ່າແຂ່ງນາງສັງຂານກັນ. ບໍ່ມີກໍານົດດອກ, ໃຜຢາກເຂົ້າແຂ່ງກະໄດ້. ບາງວັດທີ່ບໍ່ມີລູກແສ້ຫລານສາວລາວ ເພີ່ນກໍ ເອົາສາວນ້ອຍຝຣັ່ງດັງໂມເຂົ້າແຂ່ງ. ບໍ່ເປັນຫຍັງ, ລູກສາວພະຍາກະບິນລະພົມເພີ່ນ ວ່າກໍມີແຕ່ຜູ້ດັງໂມໆກັນທັງນັ້ນວ່າເດ. ເມື່ອຄັດເລືອກນາງສັງຂານແລ້ວ ເພີ່ນກໍພາກັນແຫ່ຕາມປະເພນີ. ຄັນບໍ່ແຫ່ແລ້ວຊິຄັດເລືອກເອົາມາເຮັດຫຍັງແມ່ນບໍ່? ຄັດເລືອກເອົາມາໃຫ້ຂ້ອຍບໍ! ເຮິເຮິ…ຄືຊິມາໃຈດີແທ້!
ຄໍ່າມາບາງເມືອງທີ່ມີຄົນລາວຫລາຍແດ່ເພີ່ນກໍມີການຈັດງານລາຕີສະໂມສອນຕ້ອນຮັບປີໃຫມ່ຄືກັນ. ໃນງານກໍມີການເກັບປີ້ຄ່າຜ່ານປະຕູ $10 ດອລ. ຖ້າວ່າມີນັກຮ້ອງມີຊື່ສຽງດັງໆມາແຕ່ລາວຫລືມາແຕ່ໃສກະໄດ້ວ່າແຕ່ມີຄົນປະກາດວ່າດັງໆ, ບໍ່ມີດັງກະຢ່າ, ວ່າແຕ່ງມີຊື່ສຽງມາຮ່ວມໃຫ້ຄວາມມ່ວນຊື່ນ ພວກເພີ່ນກໍເພີ້ມຄ່າຜ່ານປະຕູຂຶ້ນເປັນ $15 ດອລ. ຂຶ້ນຫລາຍເກີນໄປຫລາຍກໍບໍ່ໄດ້, ຄົນເຂົາຊິປ້ອຍຊິດ່າ. ຄະນາດປີ້ຫນຶ່ງ $15 ດອລ ບາງຄົນຊື້ກະທັງປ້ອຍທັງດ່າ ຢູ່ແລ້ວວ່າ, “ປີ້ຕາຍຮ່າຫຍັງຄືມາຂາຍແພງແທ້.“ ເຮິ! ເຮິ! ເຮິ! ຂ້ອຍລະອຸກໃຈນໍາເດ. ຖ້າເພິ່ນຈັດຢູ່ຮ້ານອາຫານເພິ່ນກໍເກັບເອົາຄ່າຜ່ານປະຕູຄົນຫນຶ່ງ $25-$30 ດອຣ ໃນນັ້ນຮວມທັງຄ່າອາຫານແລະເບຍປ໋ອງຫນຶ່ງພ້ອມ.
ສໍາລັບປີໃຫມ່ປີນີ້ນັ້ນກໍ່ຄື ມື້ອື່ນມື້ຮືນີ້ແລະ. ແມ່ນຕົກເປັນວັນສຸກເສົາແລະທິດ. ຂ້ອຍເອງຄົງຊິບໍ່ໄດ້ໄປສະຫລອງນໍາຫມູ່ດອກເພາະຊິໄດ້ເດີນທາງໄກ. ອີກຢ່າງ. ຖ້າຊິໄປສະຫລອງກໍບໍ່ຮູ້ຊິໄປສະຫລອງຢູ່ໃສ. ຫມູ່ຄູ່ກໍບໍ່ເຫັນໃຜຊິສົນໃຈຢາກສະຫລອງກັນ. ໃຜໆກໍຕຽມເຫື່ອແຮງເອົາໄວ້ໄປເຮັດວຽກເຮັດການກັນຫມົດ. ມື້ເຊົ້ານີ້ກໍມີສ່ຽວຄົນຫນຶ່ງຊື່ຈ່ອຍມັນໂທມາຫາແລ້ວຖາມຂ້ອຍວ່າ:
ຈ່ອຍ: ສະບາຍດີປີໃຫມ່ສ່ຽວ, ປີໃຫມ່ນີ້ໂຕຊິໄປທ່ຽວຫລິ້ນໃສ?
ຂ້ອຍ: ເອີ...ບາຍດີ, ຍັງບໍ່ທັນຮູ້ສ່ຽວເອີຍວ່າຊິໄປທ່ຽວໃສ, ແລ້ວໂຕເດ?
ຈ່ອຍ: ຄືກັນສ່ຽວເອີຍ, ແລ້ວໂຕເດ?
ຂ້ອຍ: ອາວ…ຫມໍນີ້ ຖາມແປກແທ້, ກະຍັງວ່າບໍ່ຮູ້, ແລ້ວໂຕເດ?
ຈ່ອຍ: ເອົາແລ້ວຫມໍນີ້! ເຮົາກະຍັງວ່າບໍ່ຮູ້! ຮືໆ…ແປກແຮະ! ແລ້ວໂຕເດະຊັນ?
ຂ້ອຍຄຶດດົນເຕີບ ບໍ່ຮູ້ແນວຊິເວົ້າຕອບສ່ຽວ, ກໍເລີຍຕອບໄປວ່າ, “ຍັງວ່າຕີ…ສົງໃສບໍ່ໄດ້ໄປຫລິ້ນໃສດອກສ່ຽວເອີຍ…ກໍຄືໂຕຮູ້ຫັ້ນແລ້ວ, ຢູ່ບ້ານເພີ່ນເມືອງທ່ານມີປີໃຫມ່ລາວກະຄືກັບວ່າບໍ່ມີເນາະສ່ຽວ. ບໍ່ຮູ້ສຶກຕື່ນເຕັ້ນ, ຄືກຄື້ນມ່ວນຊື່ນອີ່ຫຍັງເລີຍ. ບໍ່ຄືຢູ່ເມືອງລາວເຮົາເນາະສ່ຽວເອີຍ.. ເອົາຈັ່ງຊີ້ສ່ຽວ, ເຮົາວ່າຢູ່ບ້ານໃຜບ້ານມັນຫັ້ນແຫລະບໍ່ຕ້ອງໄປຫລິ້ນໃສ… ແລ້ວໂຕກໍບໍ່ຕ້ອງມາຫາເຮົາເດີ. ເພາະເຮົາຄືຊິບໍ່ໄດ້ຢູ່ບ້ານ.
ຈ່ອຍ: ເອົ້າ…ຫມໍນີ້ເວົ້າແນວໃດຫວະ? ບອກຫມູ່ວ່າບໍ່ຕ້ອງໄປທ່ຽວໃສ, ຢູ່ບ້ານໃຜ້ບ້ານມັນ, ບາດເຮົາຊິໄປຫາພັດບອກບໍ່ໃຫ້ໄປ, ເພາະຊິບໍ່ໄດ້ຢູ່ບ້ານ ພັດວ່າ. ຈັກເວົ້າແນວໃດ...ງົງ.

ຂ້ອຍ: ເອີ...ຢູ່ບ້ານໃຜບ້ານມັນຫັ້ນແລະດີ, ກຽມຕົວໄປໄຖນາ ມື້ອື່ນເຊົ້າ.

ນັ້ນຄືການສະຫລອງປີໃຫມ່ລາວ ຂອງຂ້ອຍຢູ່ອະເມຣິກາ...